Euskal lerroak abian

Nola daude helize aureoraren osagaiak?

2012-01-12T17:00:00.000+01:00

Batek baino gehiagok pentsatu du, eta baita galdetu ere, zein den 2010eko apirilean landatutakoen egoera. Jesus Mari Txurruka, nor bestela, hurbil-hurbiletik dabil landareen prozesuaren atzetik, eta, aurrekoetan bezala, argazkien bitartez berri eman digu; bi unetan gainera.

2011ko maiatzean

2011ko irailean

Falta direnei buruzko informazioa (inor haserretu ez dadin):

"Zuhaitz batzuk falta dira. Maiatzean 1, 5 eta 11. Lehena, Cyca revoluta, uztailean bigarren aldiz ohostu zutelako eta 11.a, Notofagus antarctica, ekaineko igande bateko bero zakar batek hil zuelako (hurrengo egunean, astelehen goizeko 8.30etan mangerarekin ura botatzen nenbilen, baian alperrik). 5.a, Pseudolarix amabilis, zeharo mugituta atera zitzaidalako. Irailean lehena eta hamaikagarrena, emandako arrazoiengatik."

Eta argitzeko puntu bat: aitzurraren kirtenak 80 cm. ditu.

Martxoaren 5eko bideoa

2010-12-29T09:45:00.000+01:00

Kaixo lagunok,

hilabeteak joan zaizkigu aparteko albisterik gabe. Zuhaitzek hazte-prozesuan omen daude arboretumean eta ez dakigu bestelako topaketarik burutu den ospakizun-egunaren ondoren.

Baina, gabonetako oparia bailitzan, ostera ere Jesus Mari Txurrukak ustegabeko atsegina eman digu: e-eguneko, hots, martxoaren 5eko bideo bat (are, You Tubera igotzeko gai izan da). Seguruenik, zeuen burua ikusteko modua izango duzue eta, besteak beste, diskurtsoak edota Edortak botatako bertsoa berriz entzutekoa.

Loretzen hasita

2010-05-24T16:30:00.000+02:00

Jesus Mari Txurrukak egindako jarraipenaren arabera, landatutakoetatik zuhaitz bakarra loretu da oraingoz, hosto berri piloa emateaz batera. Ezetz asmatu norena izan den? Hemen duzue froga grafiko pare bat.

"Euskal lobbya abian" ala "Bazkaltzaindia"?

2010-04-16T17:30:00.001+02:00

Joan da hilabete Leioan berriz bildu ginenetik. Eta nire aldetik blog hau sortzerakoan nituen aurreikuspenak bete egin direla onartuko dut; are, gainditu egin direlakoan nago: 5.300 inguru bisitaldi izan ditu webguneak, dokumentuak deskargatu egin dira, oraindik orain hurbiltzen denik ere badago, zuengandik jasotako iruzkinak eta mezu pribatuak...

Aipatu nuen bloga ez zela desagertuko, eta hala izango da. Baina, azken sarrera egin nuenetik hilabete t'erdi joan denez, nolabaiteko agurra egiteari egoki iritzi diot. Beharbada lanik zailena eginda dago: gutariko gehienon berri zehatza eta eguneratua lortu izana (nork zeukan orduan e-mailik?). Hemendik aurrera, gure esku egongo da, Txurrukak adierazi zuen bezala, "euskal lobbya" izango dugun abian ala, gutxienez, "bazkaltzaindiak" bilerak antolatuko dituen (nire belaunaldikoei oharra: hasi genueneko 25. urteurrena ez genuen ospatu, baina bi urte barru behintzat 30. hori ez dugu ahaztuko, ezta?)

Hortaz, ez adiorik!

PS Datu pertsonalak, helbide elektroniko eta telefonoak, ez ditugu plazaratu jakina. Hala ere, baina baten bat interesaturik badago eskatzea besterik ez dauka.

Aitor Arangurenek ateratako bideo eta argazkiak

2010-03-30T19:30:00.000+02:00

Oraingoz, hau da dugun azken ekarpena; gainera, argazkiak ezezik, bideo pare bat ere badago.

Ekitaldiko argazki gehiago

2010-03-11T14:00:00.011+01:00

Euskal Herriko Unibertsitatearen webgunetik iritsiko zara bilduma hau ikustera; erreportaia "ofiziala" nolabait esateko.

"Helize aureoa"

Horrez gain, Lea Dorronsoro ikaskideak ere zintzilikatu ditu sarean berak ateratatakoak .

Eta ez ahaztu, zeuk ere zintzilikatu badituzu edo hori egiteko asmoa baduzu, elab etiketa baliatu interesa duenak modu errazean aurkitu ahal izateko.

Edorta Españak botatako bertsoa

2010-03-08T17:45:00.000+01:00

Leioako Campuseko Arboretumean bilduta geundela, eta ohitura zaharrari jarraiki, hona hemen Edortak botatako bertsoa (doinua, Xabier Leteren "habanera")

Etxeparek zioenez
“euskara jalgi plazara”
ta Unibertsitatean
ho(r)ixe e(g)in genuen hara!
ikasturte oso batez
ikasi, juerga ta algara
baina gure arteko hizkuntza
beti izanez euskara
lehenengoak izan ginen
a zelako hotzikara!
irakasle ta ikasleok
batuta egun ta gaba
berriro e(g)ingo genuke
berriz egin behar bada
euskaldunak gara eta
hortik kontuak atara.

Oihartzuna

2010-03-06T20:00:00.003+01:00

Komunikabideetan izan du isla atzoko ekitaldiak; oraingoz, ABCn, Deian, Diario Vascon eta El Correon aurkitu ditut aipuak, gaztelera nagusi dela gainera. Hori bai, nire gustukoena Txurrukari Deian egin dioten elkarrizketa, nahiz eta "gizarte zientzietako irakasle" bezala bataiatu duten. Edonola ere, biba bulldozerra! (bide batez aipatu bere aurkezpena Interneten jartzeko eskatu niola)

Halaber, Radio Euskadiko Dani Alvarezek errektoreorde eta ikaskide ohi den Jon Irazustari egin zion elkarrizketa hemen duzu entzungai (gazteleraz); neuk ez ditut garaiak berak zioen bezain iskanbilatsuak ("tumultuoso" hitza erabili zuen) ez behintzat ingurua zegoena baino areago eta argi zegoen nahikoa planifikatua zegoela hasi ginenerako.

Ekitaldiko lehendabiziko argazkiak

2010-03-05T20:11:00.000+01:00

OHARRA

Baten batek bereak zintzilikatzen baditu, bidal dezala lotura ohiko helbidera.

E egunaren aurretik, esker onez

2010-03-04T09:00:00.021+01:00

Bazirudien ez zela helduko baina ospakizunaren atarian gaude: 25 ordu falta dira sarrera hau argitaratzean. Bihar izango dugu elkar agurtzeko aukera (goazenok, ehun eta piku guztira) eta dena delakoagatik falta direnak gogoratzekoa. Ekimenak, gainera, badu isla; besteak beste, Sustatu.com-en sarrera bat eskaini digute. Halaber, beste komunikabide batzuk ere jarri dira gurekin harremanetan. Ez dut uste hasiera batean hainbeste espero zitekeenik; eta nork pentsa arboretumean helizea osatzeko hamahiru tona harri botako zituztenik!

Ez dakit azkenean eguraldiak lagunduko duen, txartelak irakurtzeko modukoak izango diren, zuhaitzak behar bezala landatzeko modua izango dugun, hizlariek nolako trebezia erakutsiko duten, opariaren tamaina edota piskolabisaren zaporea. Edonola ere, zilegi bekit, bezperan behintzat, ekitaldia eta topaketa gauzatzeko lan gehien egin duenari eskerrak ematea; beste batzuk, laguntzaile baino ez gaitu izan. Agian sarrera honen ondoren haserretu egingo zait, edota sekta autodestruktiboaren kutsuko erretolikaren bat "jasan" beharko dut (kar kar).

Ez dut zalantzarik, lagunok: bera gabe, seguruenik, ezer gutxi izango genuke biharkoan. Mila esker, Jesus Mari Txurruka, "antolaketa batzordeko buru jauna"

81/82eko oroitzapenak

2010-03-03T21:55:00.000+01:00

Gogoratzen al da 81/82ko belaunaldiko inor egun batean txakur bat izan genuela Joserra Etxebarriaren klasean adi-adi lehenengo lerroan eserita? Ez omen da legenda urbanoa, ez horixe: Ibone Amezagaren txakurra izan zen matrikula ordaindu gabe klasean entzule. Halaxe kontatu dit ugazabak:

"Etxebarriaren fisikako klasean Noski nire txakurra lehen lerroan eserita egon zen; uste dut Todor eta Txulaika buru gogor jarri zirela eta han sartu zuten!. Egia esanda txakurra oso ondo portatu zen eta gu, ikasle guztiok, inoiz baino hobeto. Ez badut txarto gogoratzen Jose Ramonek baimena eman zigun baina zerbait txarto guk eginda...akabo!"

Halaber, badirudi euskal lerrokook partaidetza zuzena izan genuela egun hartan "medikuntza-kazetaritza" gudan. Ez dute argitu noren alde edo noren kontra, baina suhiltzaileen mangera atera "zen", antza. Hori bai, hurrengo urtean "jai" egun hori debekatu egin zen montatu zenaren ondoren ;-)

Eta futbol-partida bitxi bati buruz inor gogoratzen al da?

Argazkiak

2010-02-28T13:54:00.001+01:00

Jakin badakigu joan den mendean orain baino argazki gutxiago ateratzen zela. Hala ere, orduko argazkiren bat baduzu hor etxean gordeta, zergatik ez duzu eskaneatzen eta ondoren guri helarazi?

Argazkiekin lotuta, seguruenez kamara digitala izango duzu eta ostiralean Leioara eramateko asmoa. Ez legoke gaizki gero Interenetera igotzeko asmorik baduzu denon artean etiketa edo tag bat erabakitzea aurkitzeko errazagoa izan dadin. Proposamenik?

AZKENA
elab erabiltzea da erabakia.

Historikoen ekarpena Historiari begira

2010-02-27T12:00:00.001+01:00

Jakin badakit Arboretumean landatuko ditugun zuhaitzek osatuko duten irudia ikusgarria izango dela eta hor geratuko dela hurrengo belaunaldientzat; seguruenik, ostiraleko zenbait une ahaztezinak izango dira gutariko askorentzat eta garai hartako oroitzapenak berpiztu eta osatu egingo zaizkigula.

Hala ere, zuhaitzen informazioari erreparatuta, gehiena gazteleraz dagoela ikusi dut. Eta aurrera begira gure beste ekarpenetako bat Wikipedian horrelako edukiak euskaratzea balitz? Zer deritzozue?

Arboretumean landatuko ditugunak

2010-02-26T15:45:00.001+01:00

Hona hemen datorren astean Leioako Campusean dagoen arboretumean landatuko ditugun zuhaitz motak espiral aureoaren irudiari jarraiki, baita nork egingo duen ere:

Cyca revoluta ( Iñaki Goirizelaia, Goio Monreal & Joseba Madariagak)
Ginkgo biloba (Jazinto Iturbe, Juan Ignacio Pérez & Jon Irazustak)
Wollemia nobilis (1979-80 ikasturteko 6 irakasleek)
Pinus armandii (79-80ko Biologia, Geologia eta Kimika lizentziaturetako ikasleek, Alkain-etik Goitia-rainokoek)
Pseudolarix amabilis (79-80ko B, G eta K lizentziaturetako ikasleek, Izagirre-tik Zeziaga-rainokoek)
Sequoiadendron giganteum (80-81 promozioko B, G eta K lizentziaturetako ikasleek)
Peumus boldus (81-82ko B, G eta K lizentziaturetako ikasleek, Agirreazkuenaga-tik Kazalis-erainokoek)
Illicium henryi (81-82 ko B, G eta K lizentziaturetako ikasleek, Landa-tik Zulaika-rainokoek)
Magnolia delavayi (82-83ko B, G eta K lizentziaturetako ikasleek)
Phoenix dactylifera (83-84ko B, G eta K lizentziaturetako ikasleek)
Nothofagus betuloides (84-85eko B, G eta K lizentziaturetako ikasleek)
Davidia involucrata (Fisika lizentziaturako ikasleek)
Phytolacca dioica (Matematika lizentziaturako ikasleek)

Jon Zulaikak aipatutako batzuen argazkiak igorri dizkigu, dagoeneko Euskal Herrira iritsi zaizkigunak hain zuzen.

Elkar agurtzeko aholkuak, Txurrukaren eskutik

2010-02-22T18:00:00.000+01:00

Zorioneko bakanen batzuk izan ezik, gainerako guztioi 30-25 urteko epean fenotipoa, “kanpoko itxura” biologoak ez zaretenok ez baduzue hitz horren esangura ezagutzen, dexente, asko ez esatearren, aldatu zaigu.

Neskok, zeuen “gerrarako pinturekin” hornituta, Lourdes-eko Amak egiten dituenak baino mirari handiagoak egiten dituzten mirarizko produktu farmazeutikoen laguntzarekin eta une ezin aproposagoan ileapaindegira eginiko tindaketarako bisitarekin, hobeto disimulatzen duzue denboraren iragana. Mutilok, salbuespenak salbuespen, ajolagabeagoak eta, orohar, arlote eta alferragoak izan ohi gara “karrozeria” zaintzeko kontuekin.

Beraz, ekitaldira zatozen neska jator horrek, duela 30-25 urte ezagutu zenuen ile kixkurreko mutil bizardun argaltxo hura, gaur egun burusoil bizargabe tripahandidun bihurtuta aurkitzen baduzu, pentsatu arren, ez egiozu esan: “Kaixo XX! Ia-ia ez zaitut ezagutu! Hona hemen meloiek ilerik ez daukatenaren froga bizia!” Edo beste hau, “Zenbat gizondu den lehen mailan ezagutu nuen mutil hura!” Kontuz, neska. Subkonszienteak demasako pasadak egiten dizkigu. eta orduan, “Zenbat gizondu den ...” esan beharrean, mihiak ere bere askatasun-unetxoak dituenez, “Zenbat gizendu den ...” esatea deliberatzen du. Utikan horrelako agurrak! Burusoil eta lodi xamar topatzen bagaituzue, neskok, esaiguzue eztitsuki “ze kalba interesgarria geratu zaizun!” Edo “ze “pottolo” zauden”! Horrela t bikoitzarekin, bustidura maitakor horrekin, “ze potolo (lodi) zauden” pentsatzen bazabiltzate ere, guk, mutilok “ze potxolo zauden” ulertzen dugu, eta inork ez du txartzat hartzen “potxolo interesgarria” dela entzutea.

Eta mutil jator horrek, lehen mailan ezagutu zenuen grabitate-indarraren erakarpenari muzin eginez dena hestu, tente eta bere lekuan zeukan poxpolin hura, mende laurdena baino gehiago pasata, petxuek horizontalari eutsi ezinik dauzkan ipurtzabal papadadun bihurtuta topatzen baduzu, ez egiozu esan, ezta ametsetan ere: Kaixo, XX! Normala da nik ia-ia ez ezagutzea! Zure ipumasailek antz handiago dute nire seme-alabek gelako paretan duten posterreko mapamundiaren hemisferioekin emakume baten atzealdearekin baino! Beno, beno! Zure ikaskide ohi bati halakorik esatea pentsatzea ere! Esaiozue gozokiro “Lehen mailan zeundenean baino emakume-kurba markatuagoak dituzu, ezta?” Ezti-mamitan urtuta utziko duzue.

Periodikuak letuz ilustratzen gera (Amaia Sarasua)

2010-02-19T15:45:00.000+01:00

Nik unibertsitatean eskolak hasi arte ez nuen jakin euskal lerroa egongo zenik ere, eta aukeran eskaini zidatenean, momentuan bertan eman nuen baiezkoa. Garbi neukan garai hartan, gu bezalakoak ez bagenuen pauso hori ematen ez zuela inork emango eta.

Aurreneko egunetan isil isilik egoten nintzen saioetan eta ez nintzen apenas ausartzen ikaskideekin ere hitzik egiten, uste nuelako denak ez-bazen gehienak, ikastoletatik etorritakoak zirela. Ni Azpeitiko institututik nentorren eta han dena gazteleraz ikasten genuen. Egia da neure aldetik euskaraz alfabetatuta nengoela garai hartako gaueskolei esker, baina hitz egiterakoan kosta egiten zitzaidan batueraz egitea.

Behin horrelaxe, irakaslearen zain geundela nire ondoko ikaskideari, bi aldiz pentsatu ondoren galdetu nion: Aizu mesedez, utziko didazu egunkaria? Eta berak, Zer?, errepikatu nion esaldia eta berak berriro: Zer?. Eta azkenean esan nion: hi, lagako al diek pixketien periodikue? Eta berak: bai hoixe! Horrela uxatu ziren nire kezkak, neu bezala beste batzuk ere bazeudela ikustean!

Balsetxea, 30 urte beranduago

2010-02-16T19:00:00.001+01:00

Hau da hau, lagunok! Lehengoan Edortak idatzitakoaren ildotik, ustekabe berria: Jesus Mari Txurruka, irakasle izan arren, 80ko udaran (79/80 kurtsoa amaitu eta gero, UEUren ostean) baltsa batean burututako esperientzia hartan tartean ibili zen (bere hitzetan, "harrituta,? beste batzuk ere hilabete batzuk gazteagoak izan ginen"); lehen belaunaldiko kide gehiago ere partaide izan zen; Andone Estonba eta Amaia Sarasua, hain zuzen. Argia aldizkarian horri buruzko erreportaia egin zuten orain dela urte batzuk, 25. urteurrenean.

Jesus Marik berak azaldu didan bezala, "duela 5 urte modan zegoenez ETB-1eko "Basetxea" programa, Josu Iztuetari bururatu zitzaion 25 urte lehenago bizi izandako experientzia hari "balsetxea" deitzea" Eta hau agindu du: "Noiz edo noiz pasatuko ditut orduko diapoak formato informatikora" Eta emanaldi berezi bat prestatuko baligu?

Bitartean, eta aurrerapen gisa, argazki hau. Eta Jesus Mariren azalpena:

Bizkarrez, Andone Estonba eta aurrean ezkerretik eskumara Amaia Sarasua (aurpegia ilearekin estalita) eta Dina; hiru neskak lehen promoziokoak eta hilabete lehenagora arte nire ikasleak izandakoak. Hurrengoa ezetz asmatu ..., hurrengoa Mikel Agirreazkuenaga (Miren Agirreazkuenagaren (81-82 promoziokoa) neba), eta berna-zatiak soilik ikusten zaizkiona, Txus Arregi, Fisikaria, ez Jesus Mari Arregi, gure matematikari famatua.

Hor ikus daiteke zenbat toki geneukan. Lapiko asko baina janari gutxi.

Bizkaia Irratian egindako elkarrizketa

2010-02-14T12:15:00.002+01:00

Urtarrilaren erdi aldera Jesus Mari Txurruka ("antolaketarako batzorde-burua") eta Miren Bego Urrutia (garai haietako ikasle ohia) elkarrizketatu zituzten Bizkaia Irratian; Asier Txakartegi ibili zen tartean.

Emanaldia zuzenean izan zenez, entzuteko modurik izan ez bazenuen, hemen duzu orain horretarako aukera.

Bide batez, bihoazkie gure eskerrik beroenak irrati horretako kideei; elkarrizketaren grabaketa helarazi baitugute.

30 urteren buruan, berriz inauterietan (San Alberto Magnok bidalitakoa)

2010-02-11T19:30:00.004+01:00

Argazki digitalik ez zegoen garaikoa da ikusgai dugun hau. Irudi‑eskubideak alde batera utzi, eta hemen duzue 79/80 ikasturteko taldearen argazkia. Ez gara denok agertzen bertan, baina oroigarri gisa balio lezake. Inauteri‑sasoikoa da, 1980ko martxoaren 21ekoa hain zuzen ere. Begi bistakoa denez, oso talde kulturanitza izan zen: Indiatik, Madrildik, Anbotoko kobetatik, Mexikotik, Argentinatik, Lantzetik, Txinatik, Arabia Sauditik eta beste hainbat lekutatik etorri ziren geurera ikastera. A! eta Pantxo Villa ikusi duzue? A ze bibote zatia!

Martxoaren 5ean elkartuko gara

2010-02-08T18:00:00.000+01:00

Botxotik Ziberespaziora blogean argitaratua

... Leioako Campusean "Euskal lerroak abian" deritzon ekimenean zerikusia dugun asko; hala espero, behintzat. Egun horretantxe burutuko dira azken boladan egositako ospakizuna eta omenaldia. Baten baten lanari esker (hurrengo omenaldi baterako nire proposamena zein den argi dago), beste batzuen laguntzaz, orain dela 30 urte hasitako bideari begiratua emateko parada izango dugu; halaber, gogoratzeaz gain ziurrenik etorkizunera begiratzekoa ere bai.

Tartean, ustekabeak izan dira: laguntzeko prest azaldu direnak, jakin orduko erantzun dutenak, baina baita ardurarik txikienari uko egin diotenak ere. Aldi berean harrigarria bakanen batek ez duela ezer jakin nahi esan izana eta, bestetik, atzerrian bizi arren bertan azaltzeko ahaleginak eta bi egingo dutenak badaudela jakitea.

Landatuko den zuhaitzetako bat: gingko biloba.

Irudia, Wikimediatik hartutakoa da.

Garai hartako nire oroitzapenak, joan den mendean Leioan izenburupean aurkituko dituzu.

Veremos el próximo cinco de marzo si treinta años son nada o no, con el reencuentro de (esperemos) buena parte de quienes comenzamos en el siglo pasado el primer curso totalmente en euskera en la Facultad de Ciencias de la Universidad del País Vasco en Leioa, entre los años académicos 79/80 a la 84/85 en concreto. Si parece que fue ayer ;-)

Kresaletik kresalera (Edorta España)

2010-02-04T19:00:00.004+01:00

EUSKAL LERROAK ABIAN ekimenaren bidez, aukera izan dut nire ikaskide guztien zerrenda ikusi eta haietako batzuekin hitz egiteko. Baina bada bat, tamalez, pentsamenduz eta oroiminez baino ezin izan dudana gomutatu: Dina Bilbao Barruetabeña. 1997ko ekainean joan zen gure artetik, Karibeko itsasoan galduta.

Gogoan dut bera, irribarretsu eta alai. Mantso hitz egiten zidan —garai hartan behar nuen ulertu ahal izateko—. Oker ez banago, alde batera utzi zituen biologia‑ikasketak, eta handik aurrera bere patua izango zena urratzen hasi zen. Inon abenturazalea bazen, bera zen; ez izan dudarik.

Behin, UEUn geundela, esperientzia bat egitea otu zitzaien hango lagun batzuei: astebete edo eman baltsa batean Nafarroako urtegi batean. Eta hara joan zen gure Dina, beste lauzpabost lagunekin batera, gutxigorabehera 3m x 3m‑ko azalera zuen baltsa baten gainean astebetez edo bizitzera. Oroimenak traizionatzen ez banau, amaiera arte iraun zuen.

Eta handik aurrera, Laponia, Groenlandia, Nilo,... eta beste hainbat eta hainbat leku izan zuen abenturagune. Noiz eta 1997ko ekain malapartatu hura heldu arte. Ondarruko kresal artean jaio zen gure Dina, eta kresal artean ere joan zen mundu honetatik. Zauden lekuan zaudela, musu handi bat, Dina.

Eta Dina ekarri dut gogora, baina badira EUSKAL LERROAK osatu zituzten beste batzuk ere joan zaizkigunak: Jabi Goitia Elordi, José Luis Herrero García, Ramón Unzilla Aranberri, Joseba Koldobika Ortiz Jáuregui, Félix Unamuno Urkiza, Ane Gaminde Araluze. Barka inor ahaztu bazait.

Ero edo (Edorta España)

2010-02-01T20:00:00.001+01:00

79/80 ikasturte hartan, zientzietako euskal taldean, baginen euskaldun zaharrak eta berriak. Eta euskaldun berri gisa neraman hizkuntza “enlatatuak” talka egiten zuen ikasgelan entzuten zen hizkera bizi‑biziarekin.

Gure kimika‑irakaslea, Itziar, Berrizkoa zen, eta da, eta hark, noski, hango erara egiten zuen hitz. Egun batean, ez dakit zein motatako erreakzioa azaltzen ari zela, “ero” hitza bota zuen: “erreakzio hau ero beste hau”.

Neuk bai erotuta amaitu nuen egun hartan klasea. Orduko nire hizkuntza‑maila gainditzen zuen hizkera biziak, eta gainera, garai hartan ez neukan kontsonante oklusiboen artean dauden desplazamenduen berririk. Klasea amaitu zenean, ikaskide bati galdetu nion zer zela-eta “ero” behin eta berriro, eta hark azaldu zidan “ero” hori “edo” zela. Beste behin ere GLUP egin behar izan nuen.

Arregiren zahartze-prozesua (Txurrukaren hitzetan)

2010-01-29T19:30:00.001+01:00

Jesus Mari Arregi dugu pasadizoen iturri sarritan txoko honetan. Neuk, behintzat, bizar zuriz eta neguan txapelaz gogoratzen dut. Beraz, omenaldien garaia iritsita, honez gero jubilatua egongo zelakoan nengoen. Baina, ez omen da horrela. Beste Jesus Mari batek, Txurrukak alegia, uste ustel honen zergatiaren arrazoi zientifikoa eman dit ;-)

"Arregiren zahartze-prozesua, bere fenotipoaren arabera, asintotikoa izan ei da" (asintota berez grekeratik dator, ἀσύμπτωτος — asýmptōtos— "erortzen ez dena")

Bestela esanda, orain dela 30 urte inguru zuen itxura mantentzen du gutxi gora behera eta garai hartan , gainera, uste baino gazteagoa zen benetan. Antza, zahar itxurara arinago helduta ere hor eusten dio mailari.

Zalantza pare bat. Ez dut argi Leioako Zientzi Fakultatearen eragina genotipoan. Eta azkena momentuz; ez didate argitu oraindik "suspentso abtsolutuak" jartzeko joera duen, edota berori asintotikoa edo esponentziala den :-D

Edonola ere, Txurrukaren hitzetan berak 26 urte eta hilabeteak baino ez ditu (hamaika hilabete jartzera nindoan, bostehun eta piku izan daitezkeen arren)

Irudia, Wikimedia Commons-etik hartua.

Joserra Etxebarriaren aspaldiko argazki famatua testuinguratzen

2010-01-25T22:06:00.000+01:00

Argazkia lortu genuen eta Joserrari azalpena emateko eskatu diogu. Hona hemen berak idatzitakoa.

"Adolfo Suarezek, sasoi hartan Espainiako presidentea zenak, berari egindako galdera bati erantzutean (euskararen erabilerari buruzkoa nonbait) esan zuen, gutxi gora behera, ezinezkoa zela Kimika Nuklearra euskaraz lantzea. Nonbaiten erantzun nion bi gauza baino ez zirela behar horretarako, euskara jakitea eta Fisika Nuklearra jakitea.

Testuinguru horretan Lan Kide Aurrezkiak (orduan horixe zen Caja Laboral Popular erakundearen izena euskaraz) kanpaina publizitario bat abiatu zuen, euskara edozein arlotan erabiltzen bultzatzeko. Nitaz gogoratu ziren.

Izan ere, ordurako normal-normal ematen genituen euskaraz Fisikazko klaseak, baita zentral nuklearrei buruzko hitzaldiak ere; Lemoizko zentralaren inguruko eztabaida puri-purian baitzegoen."

Martxoaren 5ean, lagunok

2010-01-23T10:00:00.004+01:00

Fumata zuria dagoeneko. Martxoaren 5an, goizeko 10etatik aurrera burutuko da ekitaldi / omenaldia Leioako campusean, arboretum-etik hasita, Aula Magnatik pasata eta beste nonbait bukatuta.

Joan agendetan toki egiten. Ez da huts egitea onartuko!

Kutsidazu bidea, Ixabel (Edorta España)

2010-01-22T19:00:00.002+01:00

Joxean Sagastizabalek “Kutsidazu bidea, Ixabel” eleberri umoretsua idatzi baino 15 urte lehenago ere, euskaldun berrioi horrelakoak gertatzen zitzaizkigun Leioako Zientzi Fakultatean.

Egun batean, klaseen arteko atsedenaldian geundela, Joxean ikaskideak —ondarrutarra bera— behin eta berriro esaten zuen esaldi bera: “Ondarrun morun”. Eta nik, jakinminez eta ulertu ezinez, inozo‑inozo galdetu nion: ”aizu, Joxean. Zer da, bada, “Ondarrun morun” hori? Ondarrun moro bat dagoela?” Haiexek izan ziren barre‑algarak han entzun zirenak!

"Euskal lerroak abian" Euskadi Irratian

2010-01-18T23:59:00.000+01:00

Zuzenean entzuteko modurik izan ez baduzu, hona hemen bigarren aukera.
Argazkian Joserra Etxebarria eta Jesus Mari Txurruka.

Jesus Mari Txurruka eta bareak

2010-01-16T08:00:00.001+01:00

Gogoan al duzue lotura hori, Txurruka eta bareena alegia? Hara zer aurkitu dudan Internetetik saltseatzen: Gara egunkarian argitaraturiko artikulu hau (argazkia ere bertakoa da) Beraz, guri klase ematen hasi aurretiko "zaletasuna" omen da.

Egongo ote da munduan bareei buruz gehiago dakienik? ;-)

Astelehenean, Euskadi Irratian

2010-01-13T18:30:00.010+01:00

Zertan gabiltzan jakiteko eta zertan genbiltzan gogoratzeko irakurri ordez entzun nahi baduzu, datorren astelehenean, hilak 18, ez galdu bostetatik aurrera Euskadi Irratian "Arratsaldekoa" saioa.

Irakakasle ohi batek esan didanaren arabera, zerrenda pasatzeko asmoa du ;-)

Camineru-ren argazkia Flickr-en.

Jaun Baruak usoak harrapatzeko erabili zuen xedera (Iñigo Gomez)

2010-01-12T21:00:00.000+01:00

Gaurkoan Iñigok dakar Arregiri buruzko beste pasadizo bat. Ez dakit matematika ikasiko genuen, baina etorkizunerako kontu ugari utzi zigun irakasle honek :-D

"Behin kurbei istorioren bat zegokigun eta xedera hitza atara zuen Arregi xelebre honek. Nik edo beste iletradu batek hitz horrek zer adierazi nahi zuen galdetzerakoan, irakasleak esaldi hori bota zuen. Eta gero noski abestiaren musikarekin jarraitu zuen."

Eta hantxe izan gara

2010-01-10T20:57:00.001+01:00

Honen data bitxian, 10-01-10, eta 10.10etatik aurrera gainera, Onda Vascan egon gara Jesus Mari eta biok, Itsaso Güemesekin ekimenari eta garai haietako pasadizoei buruz berriketan, ea ez den inor geratzen berri izan gabe.

Adi lagunok!

2010-01-09T09:53:00.000+01:00

Zero biderkatzailearen aplikazio praktikoa

2010-01-07T21:51:00.000+01:00

Ninbe Arrartek gogoratutakoarekin bat datorren pasadizoa. Protagonistetako bat, Jesus Mari Arregi; bigarrena, Xabier Azurmendi ikaskidea, Atxurri ezizena zuena.

Arbelaren aurrean zegoen Arregi, integral baten ebazpenaren bila. "x gehi y ber bost " zela gogoratzen dut, eta polinomioa garatzea ez omen zitzaion matematikoegia iruditzen. Bere bizarra ukitzen ari zela, Atxurrik bapatean esan zion berak bazeukala bidea. Arregik begiratutakoan hasi zen donostiarra: "x ber bost gehi y ber bost eginez gero..."

Arregik, erantzun ordez, idazteari ekin zion. Xabierrek esandakoa arbelean jarri ondoren, "suspentso abtsolutua" idatzi zuen. Ez dut oroitzen baina, gainontzekoon artean algara ala isiltasuna izan zen nagusi ;-)

Orduko argazkirik ez, eta hau iruditu zait argigarri :-D

Zerbait badiote gutaz...

2010-01-04T20:59:00.000+01:00

Bai, adiskideok. Ekimenak lortu du oihartzun pitin bat dagoeneko, ea horrela garai hartako kide gehiago hurbiltzen zaigun. DEIA egunkariaren Bogando atalean eman du gure berri Iker Merodiok hilaren 31n (ez dago sarean momentuz); halaber, EITBren Aupatu webgunean ere agertu da, gazteleraz zein euskaraz. M@ken ekimenez. Seguruenik, lehenengo urrats hauek izango dute jarraipenik; adi beraz.

Zeren zain zaude?

2010-01-03T19:30:00.000+01:00

Begiratu duzu ezkerraldean dauden zerrendetan? Bertan nortzuk aritu ginen agertzen da.

Honez gero datuak baldin baditugu, X bat dago ezkerraldeko zutabean (edo gurutzea, dagoeneko ikaskidea hil bada). Bestela, ea urte berriarekin batera zerrenda osatzen dugun. Animo!

Gogoratzen al duzue "zero biderkatzailea"? (Ninbe Arrarte)

2009-12-30T07:00:00.000+01:00

Urteak pasa dira eta ez nago erabat ziur pasadizo honen protagonistarekin. Pasadizoa benetakoa da baina egilea? Auskalo! Oker ez banago Arregi zen gure matematika irakaslea 1.mailan.

Egun batean, bere etengabeko despistean murgildurik (batzuetan ikasgelara etorri eta klasea eman behar zuenik ere ahaztu egiten baitzuen) “Zero biderkatzailearen teorema” azaldu behar zigula adierazi zigun. Egia esan, hasiera batean inork ez zuen ezer ulertu, baina notak etorri zirenean….

Orduantxe jakin genuen: bere ustez matematikoki akats handia zen ezer egitekotan zero biderkatzailea aplikatu egiten zuen; hots, edozein nota bider zero berdin zero!

UEUk argitaratutako liburuak

2009-12-27T18:00:00.000+01:00

Lagungarri suertatu zitzaizkigun modu apalean argitaratutako liburu haiek, Udako Euskal Unibertsitatearen esparruan; modu apalean argitaratu baina atzetik lan handia zutenak: fisika orokorra problemak eta ariketak, matematika orokorra... Nola, ez dituzula gogoratzen?
Sarreretan batzuetan ikasleok ere izan ginen aipatuak, ba.
San Juan egunen baten sutara bota zenituela? Alazne Zaratek behintzat baditu oraindik (nik ere bai, kar kar)

Bitxikeriaren bat: fisika orokorra (I) deritzonean, kapitulu bakoitzaren hasieran, bertso bat dago. Hona hemen bat, adibide gisa:

Fisika horren Historirako
garrantzizkoa da Newton.
Bere burutik atera zitun
hiru printzipio sakon.
Pentsaturikan gure zientziari
zer laguntza eman dion,
hainbeste lanik egin duenik
ez dut nik aurkitzen inon.

Inozentadak

2009-12-24T18:40:00.000+01:00

Abenduaren 28an ezezik, unibertsitatean ere ohikoak omen ziren inozentadak, joan den mendean gutxienez. Nik ez dut izandakorik gogoratzen, beno, bat bai, umore bitxia zeukan irakasle batek egina gainera.

Han geunden urduri antzean, zer entzungo eta gertatuko zain lehendabiziko egun hartan Leioan. Eta, hara non, matematika irakasgaian alderdi praktikoaren ardura zeukan irakasle bizardunak bere arlorako liburu gomendagarriaren izenburua arbelean idatzi zuen. Honen antzeko zerbait zen:

Б. П. ДЕМИДОВИЧ, СБОРНИК ЗАДАЧ И УПРАЖНЕНИЙ ПО МАТЕМАТИЧЕСКОМУ АНАЛИЗУ, МОСКВА, 1977

Denok zur eta lur, ez genuen tutik ulertzen; horren konplikatua izango ote zen matematika unibertsitatean? Barrezka hasi zitzaigun Arregi irakaslea, izenburua errusieraz baitzegoen. Jakina, berak zuen argitalpen zaharrean hala zegoen Demidovich gogoangarria.

Hamaika integral egin genuen gerora, beti "suspentso abtsolutuaren" beldurrez ;-)

Eulien masaren garrantzia

2009-12-20T18:26:00.000+01:00

Rafa Saiz, Tarratek, Botxotik... blogean azalduriko pasadizoa dakart gaurkoan. Halaxe kontatu zuen.

"Xabier Insaustik esan zion Joxerrari, azterketa batean, ariketa batean datu bat falta zela: zer eta ate birakari bati itsastsita bera ere bueltaka zebilen euliaren masa! Oraindik dut buruan Joxerraren etsipena!"

Ea pasadizo gehiago helarazten diguzuen guztioi. Eta baten batek garai hartako argazkirik balu...

Pekatuaz damutzeko proposamena (Jesus Mari Txurrukak idatzitakoa)

2009-12-18T03:00:00.000+01:00

Kaixo gibelandiok:

Salbuespen ohoregarri batzuk aparte utzita, orain arte zuetariko gehienok ez duzue tutik ere egin zuen ikaskideen zerrendak e-mailez edota telefonoz hornitzeko. Ez egitearren, zuetariko batzuek/askok ez didazue ezta erantzun ere egin esateko, “OK, abisatuta nago”.

Zuon gehienon gibel-handitasuna hain maila gorenera iritsi da, non etorkizun ez oso urrun batean “gibela lehertuz” hilko zaretela aurreikusten dudan. Tamalez, ordurako ni bihotzekoak emanda hilda egongo naiz, izan ere hain da handia nire larritasuna ikustean denbora aurrera doala eta oraindik zerrendetako hutsuneak nabarmenki gehiago direla beteta dauden laukitxoak baino, ezen etengabeko artegatasun-egoeran takikardiak jota bizi naizela.

Dotrinan irakasten zigutenez, eta dakizuen moduan ondo ikasitakoa berandu ahanzten da, pekatuen aitortza on bat egiteko bost urrats egin behar ziren. Lehen hirurak ekarriko dizkizuet gogora, ziur bainago zuetariko gehien-gehienok ere, salbuespen ohargarri batzuk izan ezik (nik bakarra ezagutzen dut), nire antzera, buruz oso ondo ikasi zenituztela.

Lehena, “examen de conciencia”. Zuetariko gehienok zerrendak betetzeko eginkizun honetan eskainitako laguntzari buruz oso, baina oso-oso, kontzientzia txarra izango duzue, ezta? Bestalde, benetan ahalegindu zaretenoi esan behar dizuet nire bihotzean gordeko zaituztedala. For ever, betiko, esan nahi baita, Alzheimerrak bortizki erasotzen ez nauen bitartean.

Bigarrena, “dolor de los pecados”. Honezkero zuetariko asko damututa egongo zarete erakutsi duzuen nagikeriagatik, ezta? Ba dakizue bihotzeko samin horiek arintzeko erremediorik onena zein den, ezta? Ikaskideen bilaketari ekiten diozuenean, lehen helbideak aurkitzearekin eta niri bidaltzearekin batera, ikusiko duzue zein lasaitasun ederra igartzen hasiko zareten. Jesus Mariren hitza. Amen.

Hirugarrena, “propósito de la enmienda”. Okerrak zuzentzeko asmorik ez badago, alferrik beste guztia. Ba dakit, jakin, oso pertsona lanpetuak zaretela eta gauza garrantzitsuagoak dituzuela egiteko ikaskideen helbideak bilatzen ibiltzea baino. Baina, eta oso garrantzitsua da “baina” hau, oraingo honetan gertatzen dena da Mafaldak (ba dakizue, Quino-ren pertsonaje ospetsu hori) behinola esan zuena gertatzen dela: “Betiko moduan, premiazkoa denak ez du astirik uzten garrantzitsuak diren gauzak egiteko”. Bada, hori, gauza garrantzitsuak egiteko izango dituzuela zalantzarik egiten ez dudan arren, baldin eta zuen eginkizun horiek ez baldin badira, oso, baina oso-oso, premiazkoak, hora et hunc, orain eta hemen, albo batera lagatzeko eskatzera natorkizue eta ikaskideak lokalizatzeari gogoz ekin diezaiozuela erregutzera. Zuek lokalizatuta egotearen zorte ona izan duzuela eta besteak hor konpon? Gustatuko litzaizueke ospakizunaren berri egunkarian irakurtzea eta pentsatzea, eta ni zergatik ez ninduten abisatu?

Nola bila daitekeen ikaskide ohi bat? Denoi bidali nizuen izen-deituren zerrenda; buruari pixka bat eraginda gogoratuko duzue: hau Mutrikuarra zen, beste hau Dimakoa, eta abar. Seguru nago zuen ikaskideen artean egongo zela “zuen bihotzeko azukre-koxkorra”, dela “Getxoko surflari guaperas” hura, dela “Debako huraxe bai neska katxarroa”, ... Orain daukazue aukera berriz ere zuen amodio platoniko, edo “platonikotik” bat ere ez zuen, harekin berriz harremanetan jartzeko, ... A zer lotsa, ... Gure zaharrek esaten zuten moduan, “lotsa? lapurretan egiteko besterik ez”.

Nola kontaktatu? Google-en sartu izen eta deitura biak eta ikusiko duzue zenbat lekutan agertzen zareten. Tira hari-mutur horietatik eta tokiren batera helduko zarete.

Ez zaretela inora heldu? Sartu hemen,
Idatzi deitura biak eta herria eta mutila bada ziur aski agertuko zaizue. Neska bada eta etxeko telefonoa bere izenean ez badago, ziur aski anaiaren bat agertuko zaizue. Deitu telefonoz, esan ikaskidea zarela eta arreba bilatzen ari zarela ..., eta kitto, kontaktua eginda! Nik horrela lortu dut telefono bat baino gehiago, “Arratsalde on, Jesus Mari Txurruka naiz eta Unibertsitatean bere Biologiako irakaslea izan nintzen ...” Listo! Hutsune bat gutxiago ... Gogoa (eta denbora apur bat) eduki behar dira, besterik ez.

Amaitzeko. Zer esan sare sozialei buruz? Zuetariko zenbat zaudete horrelakoetan sartuta? Ez duzu blog-ik idazten? Ezta blog-en batetan iruzkinik uzten? Hori ere ez? Beno beno ... Baina zuek zein mundutan bizi zarete?

Horiek gabe ere ederto konpontzen ginen euskal tribu honetan. Ba dakizue tribuetan zer gertatzen den, bilatzen zabiltzana senitarteakoa ez bada (urrunekoa bada ere), seguru-seguru senitartekoren baten lagun mina dela ... Galdetu zeuen gurasoei nola konpontzen ziren aspaldian ikusi gabeko baten baten peskisan: “Galdetuko diot koinatari, ze ba dakit bere neba ni bilatzen nabilen mutilaren kolejio berean ikasi zuela, ... agian jakingo du non zehar dabilen, ...” “Lehengusinaren nobioa izan zen mutil haren arrebarekin ezkondu zena “soziedade” edo “txoko” berekoa zen ...” Nola uste duzue, bada, lortzen zirela/direla “entxufeak” herri honetan?

Hara, bada, gibela lehertzeko patu malapartatuari aurre egin nahi badiozue, har ezazue eskura jarri dizuedan antidotoa. Has zaitezte, baina derrepentean, zuen ikaskideen helbideak niri bidaltzen.

Hurrengora arte.

Jesus Mari

Oroitzen hasita

2009-12-16T23:30:00.000+01:00

Oharra: Botxotik ziberespaziora blogean argitaratua 2009ko abenduaren 6an

Badakizu irakurle testuingurua, 81/82 ikasturtea, Zientzi Fakultatea, lehen maila euskaraz, sail guztietako ikasleak batera (eta hala ere, gutxi). Nolako urteak! Euskal futbola Espainiako ligan nagusi zen garaia, Bilboko Aste Nagusia lehendabiziko urratsak ari zen ematen...

Nondik edo norekin hasi pasadizoen segida? Goazen genituen gaien orden alfabetikoz; lehenengoa, beraz, biologia.

Bareez kezkaturik bizi zen gizon bizardun bat egokitu zitzaigun irakasle. Kasu hartan ez zen "karakola eta barea", ez horixe; "barea eta barea", izaki hori baitzen bere ikerketen muin. Batzuetan, ordea, ikasleengana hurbildu behar. Eta libururik ezean, fotokopiak eskertu egiten ziren. Ulergaitzak izan arren; tira, zenbat hitz berri ikasteko! Inoiz, gainera, ezin ulertu.

Beraz, baten bat ausartu zen galdetzera: "aizu, Txurruka, zer esan nahi du honek?" Eta erantzun azkarra, "ez naiz oroitzen. begiratu ea hiztegiak zer dakarren". Ikasleak berriz, "hor dago koxka; ez dator ezer". Eta gure irakasleak, lasai asko, eztabaidaren bukaera gisa: "tira, asmatu egingo nuen orduan".

Ez zen ikasturte osoan gurekin aritu; eskiatzen lesionatu omen zen. Tira, hori ere ez da egia osoa orduko zurrumurruei kasu eginez gero: bera geldi ei zegoen eta emakume bat gainera etorri zitzaion.

Garai hartan behintzat harreman ona genuen ikasleen artean, baita irakasleekin ere. Eta ihauteriak heldu aurretik afari bat egitea pentsatu genuen; bilbotar pare batek antolatu genuen zazpi kaleetan. Jatetxea eta taberna zen Somera kalean; jantokira heltzeko eskailera dexente igo behar gainera. Eta, ustekabean, nor agertuko, eta lesionaturik zegoen irakaslea, makulu eta guzti, sekulakoak esanez antolatzaileei buruz, jakina. Eskerrak ez zuela jakin nortzuk ziren.

Eta jakin bazuen ere, ez zen gorrototsu ibili, nirekin behinik behin. Nahiz eta bi aldiz egiaztatu nuen zer esan nahi zuen azken aktan nire izenaren ondoan zegoen OM hark. Txurrukarekin urte osoa eman eta gero, auskalo zer izan zitekeen!

Hauxe da gure hasiera (Jesus Mari Txurruka)

2009-12-15T13:28:00.001+01:00

Kaixo denoi:

Honezkero zerbait entzunda izango duzue ospakizun bati buruz. Datorren urteko otsaila inguruan egiteko asmoa dugunez, oraindik ez dago gauza handirik zehaztuta. Euskara errektoreordearen aurrerapenei buruz oraindik ez zaidanez ezer iritsi (hiru kanpusetako zenbait irakasle omendu nahi dituzte), une honetan soilik Zientzia eta Teknologia Fakultateko asmoen berri eman ahal dizuet.

Bestela esanda, ospakizun bat egitera goaz datorren urteko otsaila inguruan, lehen sei promozioko jendearekin: orain dela 30 urte hasi zirenekin hasi eta orain dela 25 urte hasi zirenekin amaitzeko.

Beraz, tarte horretan euskaraz lehen maila egin zuenetariko baten bat ezagutuko bazenute, eskertuko nizueke aditzera emango bazeniote zein den gure asmoa, eta eskatuko bazeniote niri posta elektronikoaren helbidea eta telefono-zenbakiren bat bidal diezadala.

Orain arteko gure asmoak ondokoak dira.
- Gabonak eta Aste Santu bitartean egin ospakizun-ekitaldia.
- Aukeran, ostiralen batetan.
- Goiz erdi inguruan, Leioako campus-eko arboretum-ean lau zuhaitz landatu: zuen irakasleak izan ginenok bat, eta bi promozio bakoitzeko bana; hau da, 79-80 eta 80-81 promoziokoek beste zuhaitz bat, 81-82 eta 82-83koek beste bat, eta abar.
- Lau puntu kardinalei begira, eguzkiaren biraketaren arabera ordenatuta: irakasleok ipar aldera (gu beti iparra markatzen), 79-80 eta 80-81 promoziokoek ekialdera begira legokeena, 81-82 eta 82-83koek hegoalderakoa, eta abar. Aditzera emanez, horrela, EHUko harmarrian dagoen "eman ta zabal zazu" lemari jarraituz, denon artean lau haizeetara hedatu dugula euskarazko jakituria.
- Lau zuhaitzak elkarren artean lotuta daudela adierazteko, lurraren gainean hartxingarrez irudikatua, lauburu bat, beso bakoitzaren mutur zabal biribilaren erdian zuhaitza daukala.
- Zuhaitzak landatu ostean, Aula Magnan ekitaldi akademiko bat, non zuetariko baten batek zeuen bizipenak kontatzeko (5-10 min) parada izango duzuen. Animatzen al da zuetariko baten bat bere burua horretarako eskaintzen? Lasai, inor ez egotekotan, "hatzamarkraziak" erabakiko du. Orduko irakasleren batek ere hitz egin behar lukeela irudituko zaizuenez, nik Joserra Etxebarria proposatuko dizuet (Ez dut uste ezezkoa emango didanik).
- Adierazi nion Jon Irazusta euskara errektoreordeari (82-83 promoziokoa, gutarra beraz) Goio Monreal-i EHUk bere eskerronak eman behar lizkiokeela hasierako urteetan euskal lerroak bultzaten egindako lan eskergagatik eta ekitaldi honetara etortzeko gonbita luzatzeko eskatu nion. Ez dakit gestio horiek zenbateko aurrerabidea egin duten.
- Agintarien (Goiorenak, oraingo errektorearenak edo euskara errektoreordearenak) hitz batzuk eta etorritako bakoitzari oroigarri bat (gure unibertsitateko harmarria duen pin bat-edo, hori baita ohikoena) banatzeko ekitaldia.
- Ustekaberen bat prestatzeko asmoa daukat, baina (oraingoz) zantzurik ere ez dizuet emango.
- "Piskolabis" bat, catering-eko enpresaren batek eskainia. Era horretan gure arteko harremanak errazagoak izango dira, "piskolabis" formatoak denok denokin egoteko aukerak errazten baititu.

Ekitaldi horretan landatzeko proposatzen dudan zuhaitza zein den ikus dezazuen, ondoren doakizue esteka parea, bat eta bi.

Agudo ibil zaitezte, zeren latinezko aforismoak dioenez, tempus fugit (denborak ihes egiten du)

Oraingoz, besterik ez. Soilik gehitu etorriko direnen zerrendak gabonak aurretik osatuta edukitzea gustatuko litzaidakeela eta, halaber, ea zer irizten diozuen nire asmoei. Zuen ideia-ekarpenak ere eskertuak izango dira.

Gaia argiago geratuko zitzaizuelakoan, hurrengora arte,

Jesus Mari